Ponedjeljak: Izazov – dan bez žaljenja

Ne valja vruće, ali ne valja ni hladno. Ni da je vjetar, ali ni kiša ne valja.

Ne valja kada je direktor tu, ali ne valja ni kada direktor ode. Djeca su nešto opet zeznula. Majke ne valjaju, nerviraju nas, pretvaraju se u svoje majke i nervira nas pomisao da bismo i mi mogle da se pretvorimo u njih.

Ne valja more, previše turista, ali ne valja ni kada je malo turista. Turisti koji imaju puno para su bahati snobovi, turisti koji imaju malo para su paradajz turisti. Ne valja temperatura vode, ove godine je toplija nego ikad, ali je manje slana, glečeri se otapaju, to ne valja.

Ne valjaju drugi ljudi, komšije, prodavci, taksisti, čistači ulica, bankari, moleri. Ne valja lak na noktima, grozna je boja, i ne valja kako ona mala fenira. Ne valja kako izgledaju kukovi u tim pantalonama. Ne valja ručak, neslan je, ali ne valja ni previše soli, to razjeda bubrege.

Ne valja novi restoran, konobari su nadrndani, ne valja piletina puna antibiotika, globalno zagrijavanje, dilema oko vakcina, a ovaj novi sistem zakazivanja specijalističkih pregleda tek ne valja.

Ne valja vlast, ne valja opozicija. Ne valja novo radno vrijeme, a i staro je bilo nikakvo i ništa nije valjalo.

 

Ne znam za vas, ali ja svakodnevno slušam ovakve žalopojke – ne valja ovo, ne valja ono, ništa ne valja! Nekad se i sama žalim, priznajem, a što je najgore često se žalim oko stvari koje mi uopšte toliko ne smetaju. Komšinica počne kako se ne može disati po ovoj vrućini, i ja da je ispoštujem jer ima 74 godine i baš me briga da se raspravljam sa njom, kažem: „Da, stvarno je užasna ova vrućina“, iako ja uživam u ljetnjih 40+ stepeni! Budalaštine, a svi to radimo. Čak koristimo žaljenje i gunđanje kao odlične načine da počnemo razgovor sa nekim novim. A ovo je siguran recept za to da se osjećamo jadno, tužno i smoreno.

Najljepši način da ti ovaj ponedjeljak bude super je da prihvatiš sljedeći izazov: 24 sata bez ijedne izgovorene žalopojke!

Dakle, pravila su sljedeća: cijeli dan se nikome nemoj žaliti ni oko čega, na tuđa žaljenja odgovaraj neutralnim ili pozitivnim odgovorima, a ako nemaš ništa lijepo da kažeš onda jednostavno prećuti. Nemoj da učestvuješ u kolektivnim jadikovkama. Ljudima u prolazu daj poneki kompliment, ispričaj kolegama nešto lijepo što se desilo tokom vikenda, ne ogovaraj. Ako postoji neki problem koji treba da se riješi, fokusiraj se na rješenje a ne na to koliko je problem naporan, težak, velik i grozan.

A ako imaš gunđala u svojoj okolini, pošalji i njima ovaj izazov, prijaće svima!

 

Ukoliko želiš da zakažeš individualni koučing sa mnom u Podgorici ili preko Skype-a, piši mi na jelena@smartchange.me 
Ilustracija i tekst su autorski rad Jelene Marković. Zabranjeno je kopirati sadržaj sa ove stranice bez dozvole autora.

0 Komentara

Postavi komentar

Želiš da se pridružiš diskusiji?
Slobodno komentarisi!

Leave a Reply

Your email address will not be published. Required fields are marked *